Sentence in hindi, english sikhe hindi me | Hindi Khazana

Hello 😊  
English seekhne ke liye doston 3 cheeze seekhni bohat zaroori hoti hain,
  1. Parts of Speech
  2. Sentences
  3. Tenses
jisme se ye doosra post hai, agar aapko Sentence samajhne hain to issey pehle aapko Parts of Speech ko samajhna zaroori hai, to pehle Parts of Speech ko samjhen aur phir Sentences ko aur agar aap Parts of Speech jaante hain to aaiye is post ko jaari rakh kar jaante hain Sentences -


Doston Sentences seekhe bina English to kya balki koi bhi zubaan koi bhi bhaasha seekhna ya bolna mumkin nahi, hindi me sentence banana to aap maahool ki wajah se khud ba khud seekh gaye lekin English ke liye aapko Sentences ka tareeka rules wagarah sab jaanna bohat zaroori hai.
To aiye jaante hain-
Banner
Sentences in hindi


Sentence in Hindi

Baat-cheet karne ke liye hum lafzon ko ek khaas dhang (in a special manner or with a rule or formula) me mila kar apni baat ko kisi se kehte hain!
lafzon ko jab is tarah mila kar jab koi baat kahi jaati hai to us ek baat ko English mein Sentence kehte hain!

Sentence ke prakaar jaanne se pehle uske hisson ya bhaagon ko jaan lete hain! 
to aaiye dekhen ki Sentence banta kaise hai-



3 Parts of Sentence-


1. Subject -

Subject Sentence ke us bhaag ko kehte hain jiske baare me baat hoti hai, jaise school me subjects hote hain Hindi, English, Math vagarah, agar Hindi ke period me baithe huye hain to baat sirf Hindi hi ki hoti hai kyonki subject hindi hai, isi tarah Sentences me bhi tareeka hai ki jiske bare me baat ho rahi ho wohi Subject kehlaata hai.
Subject Insaan, Jaanvar, Jagah ya koi bhi cheez ho sakti hai matlab Subject koi Noun bhi ho sakta hai aur Pronoun bhi aur baaki ke hisson ko Predicate kehte hain, jaise-

      Subject     Predicate
           Amy     is a girl. 
               This book    is very famous. 
                  He      is not a girl.



2. Verb - 

Ye Verb bhi wohi hai jo humne pichle post Parts of Speech me padhi thi, verb un lafzon ko kehte hain jinse kisi kaam ka pata chalta hai jaise run se bhaagane ka, eat se khaane ka, sleep se sone ka pata chalata hai!
Inme Action hota hi isliye aise words ko Action Words bhi kaha jata hai.



3. Object -

Subject jab koi act karta hai to vo kisi na kisi cheez par to karega na? ab jaise "i play cricket" me "i" ho gaya subject kyonki "i" hi to act kar raha hai, "Play" ho gaya act kyonki ye ek action word hai, to object kya hua? object hua "cricket" kyonki ye wo word hai jis par actor dwaara action kiya ja raha hai means isi par to khel khela gaya hena 😄 !




Points to be Remember-

*Verb aur Object, Predicate ke 2 hisse hain,
  aur subject aur predicate, Sentence ke 2 hisse hain!

*Jis tarah subject koi bhi noun ya pronoun ho sakta hai usi tarah object bhi koi bhi noun ya pronoun ho sakta hai, bas farq itna hai ki Subject Sentence ka pehla hissa hai jo shuru me aata hai aur Object Sentence ka aakhiri hissa hai jo aakhir mein aata hai,


*Subject vo hai jiske baare me baat ho rahi hoti hai ya jo act kar raha hota hai aur object vo hai jis par act ho raha hota hai!


*Sentence ke in 3 hisson ko istemaal karne ka ek tareeka ya usool keh sakate hain jiske bina Sentence sahi nahi maana ja sakta hai. aur wo formula ye hai -






The Formula of Sentence -

Subject + Verb / Helping Verb + Object


Matlab usool ke mutaabik, agar Sentence me verb hai to verb, subject ke baad hi istemaal hogi,
haan agar Sentence negative hai to helping verb ya model verb, subject se pehle istemaal hogi, jaise "May i come in?" me "May" jo ki ek model verb hai, subject jo ki "i" hai, se pehle istemaal hui hai! 
Isi tarah object bhi verb ya helping verb ke baad hi istemaal hota hai pehle nahi!

Chalie ek aur aasaan example se subject, verb aur object ko samajhate hain - 
"I love you."
 is Sentence me "i" subject hai kyonki vo "i" hi hai jiske baare me Sentence hai aur "i" hi act kar raha hai!

isee tarah act ya verb ho gayi  "Love"
aur jis par act kiya ja raha hai vo kaun hai?
vo hai "You", aur jis par act kiya jaata hai vo hi to object kehlaata hai to object hua "You"

aaiye ab Sentence ke prakaar jaan lete hain!




3 Types of Sentence

Sentence 3 tarah ke hote hain -

1. Affirmative Sentences -

Aise Sentence jinke zariye koi baat sirf kahi ya bataayi jaati hai aur simple hote hain, jinke aakhir me full stop laga hua hota hai wo Simple Sentences kehlaate hain.
In sentences me 3rd person ke sath Verb ki 5th form ka istemaal kiya jata hai jise Parts of Speech post ke Verb wale paragraph me samjhaya gaya hai. 
Examples :
This is Arshan Amrohvi.
He writes blogs.
I like to read his blogs.



2. Negative Sentences -

 Inme Not ka istemaal hota hai, jis bhi Sentence me Not ho vo Negative Sentence hoga!
Agar sentence me verb hai to 1rst aur 2nd person ke sath helping verb ki jagah Do Not aur 3rd person ke sath Does Not use hota hai, aur agar sentence me verb nahi hai to helping verb ke baad sirf  Not use hota hai.
Jaise :
Ram is not a girl.
He does not play cricket.
I do not play cricket. Etc.


3. Interrogative Sentences -

Jis Sentence ke zariye kuch poocha jaye vo Sentences In-terro-ga-tive Sentence kehlaate hain. In sentences me helping verb subject se pehle use kee jati hain.
Inke aakhir mein ? hota hai!
Jaise : 
Is ram a good boy?
Do you play cricket?
Does he play cricket? Etc.


to dosto  ye tha post Sentences in Hindi

isey WhatsApp par share karna na bhoolen doston 😊
Share on Whatsapp [Phone]

Share on Whatsapp [PC]

0 Comments: